Ad Alesum Abbatem
Quotquot littore uel fuere nostro,
Vel sunt, aut aliis erunt in annis,
Cunctarum pater eruditionum,
Et qui quotidie referre pergis
Quantos Illyricum priore saeclo
Nec nouisse latus puto lepores.
Istae sic oleae otium perenne
Componant tibi, laeserint nec Austri
Vicinum nemus, ut queat trapetis
Felix solvere debitum laboris.
Neu celes modo de meis Camoenis
Quid, doctissime, senseris: Catullum
An quidquam redolent, Horatiumue?
Mallem hoc, quam Lybias, utrumque et Indum.