Croatiae auctores Latini: inventa  
   domum |  qui sumus |  textus |  auxilia |  tolle, lege! |   
Đurđević, Ignjat (1675-1737) [1700], Poetici lusus varii, versio electronica (), versus 5453, verborum 35062, Ed. Veljko Gortan [genre: poesis - epigramma; poesis - elegiacum; poesis - ode; poesis - sonetto; poesis - idyllium; poesis - metamorphosis; poesis - paraphrasis] [word count] [djurdjevipoe].
Previous section

Next section

IV. CAPHEI THRACIS IN PLANTAM SUI NOMINIS METAMORPHOSIS
Iam populi aurorae, iam cesserat India Baccho,
Et Deus a domita tellure ad moenia Nisae
Ibat ovans Arabasque suos; insana iuventus
Mota mero pingui et viridi redimita corimbo
Pone subit, Satyri succinctaque nebride Maenas.
Ille sedet curru, gravibus iuga plexa racemis,
Tela racemus obit, plaustroque virente subacti
Lora capistrati mordebant vitea linces.
Ut ventum ad Nisae portas, sociosque deumque
Percussit rerum facies nova: turbidus horror 93
Undique et horror erat, circum vineta iacebant
Sacrilega vastata manu, vis improba botros
Sparserat et vites ima ab radice revulsas,
Ceu solet aestiva metuendus grandine turbo
Spargere vota pii nondum matura coloni.
Clamabant Satyri Niseia sceptra Licurgo
Cessisse, et rursum superas rediisse sub auras
Ogigium trepidae iurabant Penthea Bacchae;
Oscula dant truncis, iungunt quoque vitis amatae
Cum lacrymis lacrymas, vulsa cum fronde capillos.
Auctor non latuit. Foribus ruit ecce reclusis
Fulmineus Capheus (hic Bacchi invaserat aulam,
Thrax proavis spretorque dei, nam sola colebat
Flumina et in vitreis latitantes Naiadas undis).
Utque in conspectum septus furialibus armis
Se dedit, exclamat, tumida sub voce minantis
Intremuit Lenea cohors, gressusque labantes,
Membraque correptis fulsere cadentia tyrsis:
»Capripedum«, dixit, »non ebria castra nec istum
Poscit Nisa ducem, cui nulla potentia mentis,
Cui mollis facies, qui turpia sustinet unus
Timpana pro sceptris, pro frontis honore corimbos.
Regna manum mentemque petunt, ergo ocius isthinc,
Semivir, urge pedes, exemplo perdere molli
Magnanimos Arabas rituque relinque profano!
Nec dum terga dabis? Sic me mea numina, pulchrae
Naiades servent, faciam, probrose Bimater,
Praelusisse tuo vineta excisa cruori.
Sperno tuos latices et, quae te frangere norunt,
Flumina sola colo, utque tuas explodere vites
Praevaleam, populis de sanguine pocula nostro
Ipse darem.« »Dabis«, exclamat Leneus et ore
Emicuit toto, qualis post bella gigantum
Constitit oppresso supera ad capitolia Rheto.
At Capheus verbis ictus ceu fulmine parvam
Cogitur in molem corpusque virescere cernit,
Vidissetque suas frondes cumulataque baccis
Brachia, ni tenues petiisset spiritus auras.
Priscum nomen inest. Ast hinc cognata propago,
Qui Rhodopen Hebrumque tenent, Arabesque Getaeque 94
Bassaridum ciatos Bacchique odere liquorem
Deque suo Capheo succos paterasque calentes
Mutato de fratre bibunt. Sic ultor ab orbe
Pellit adhuc mollem Capheus post fata Lieum.
Previous section

Next section


Đurđević, Ignjat (1675-1737) [1700], Poetici lusus varii, versio electronica (), versus 5453, verborum 35062, Ed. Veljko Gortan [genre: poesis - epigramma; poesis - elegiacum; poesis - ode; poesis - sonetto; poesis - idyllium; poesis - metamorphosis; poesis - paraphrasis] [word count] [djurdjevipoe].
Powered by PhiloLogic

Creative Commons License
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom
Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Podatke o projektu vidi na www.ffzg.hr.
Za uporabe koje prelaze okvire ove licence obratite se na http://www.ffzg.unizg.hr/klafil/dokuwiki/doku.php/z:digitalizacija-hrvatskih-latinista.