LVIII. RELIGIOSUS IUVENIS A MODERATORE, NE IN INDIAM PERGERET, INHIBITUS LOQUITUR. EPIGRAMMA 30.
O mihi fas esset Xaveri signa secuto
Ducere magnanimos per loca saeva gradus!
Me, me Peruvii saltus, me nigra videret
Gens Charibum et Brasilo sole perustus ager.
Sub Cancro sudasse iuvat, tremuisse sub Arcto
Et signasse meum fonte cruoris iter. 169
Sed teneor, sacros generosi pectoris ignes
Fatidico moderans temperat ore pater.
»Siste gradus!«, inquit, »tua vota ipsamque repulsam
Pensabit duplici munere numen amans.
Mens subiecta Deo cessando magna meretur
Et sublime aliquid nil faciendo facit.«