385. DE PIO PONTIFICE MAXIMO, QUI OBIIT IN EXPEDITIONE CONTRA TURCOS
Cum Pius in Turcos pia tollit signa Secundus,
Dum culpant segnes, strenua bella, patres,
Dum simul Occasus sequitur, simul Arctos euntem,
Solvere dum classem, dum dare vela parat;
Hadriaci extinctus Piceno in litore ponti,
Famosum subito funere rupit iter.
Sis licet ingentis, vana spe lusa, triumphi,
Da veniam fatis, anxia Roma tamen.
Praecisas neu plange vias; fortasse fuisset
Pervenisse minus, quam properasse fuit.