Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
-- 639 -- quos in terra patimur, requies
illa, qua in cęlesti regno nos fruituros speramus. An quia sexagenario numero totum tempus
animalium in terra degentium distribuitur. Prima enim ętas fuit ab Adam usque ad diluuium,
[ERROR: no reftable :]
Aetates
secunda inde usque ad Abraham, tertia ab eo usque ad David, quarta usque ad
transmigrationem Babylonicam, quinta usque ad Christum. Sexta nunc agitur, et in die Iudicii
finietur. Septima erit sabbatismus, id est, nostra in Deo requies sempiterna. Sexaginta igitur
stadia sex curricula temporum sunt, donec ad castellum perueniatur quietis atque beatitudinis,
quando corpus corruptibile nostrum induet incorruptionem, et quod in nobis mortale est,
mutabitur in immortalitatem.
Et factum est — inquit — dum fabularentur et secum quęrerent, ipse Iesus
appropinquans ibat cum illis. Obserua diligenter, quia semper iis appropinquat
Dominus, qui de illo inter se colloquuntur. Ait enim: Vbi sunt duo uel tres congregati
in nomine meo, ibi sum in medio eorum. Rursum obserua, quia ipse Iesus de sua
diuinitate dubitantibus non se manifestat in ea forma, qua ab iis, qui credunt, agnoscitur.
Sequitur enim: Oculi autem eorum tenebantur, ne eum agnoscerent. Non tamen
deserit illos Deus, qui, dum de ipso dubitant, nosse tamen id, quod uerum est, concupiscunt.
Ait ergo ad illos: Qui sunt hi sermones, quos confertis ad inuicem, et estis tristes?
Non interrogat nescius, cui nihil est occultum, sed eos arguendi occasionem dispensans,
ne ambigui uacillent. Ideo infertur: Et respondens unus, cui nomen Cleophas, dixit ei:
Tu solus peregrinus es in Hierusalem, et non cognouisti, quę facta sunt in illa his diebus?
Quis alter cum Cleopha fuerit, superuacaneum est quęrere. Alii ipsum Lucam putant
fuisse, alii alium. Quicunque tamen fuerit ille, satis est, quod appareat de coetu extitisse
discipulorum, qui passioni necique Domini sui affuerunt. Cleophas igitur prior respondit.
Cuius quidem responsionis hanc reor esse sententiam: Tune solus es ex plurimis, qui ignoras,
quid factum sit. Quasi dicat: Quod neminem latet ex illis, qui Hierosolymis his
Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
|