Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
-- 654 -- eius, non credam. Diuina credimus dispensatione factum, ne Thomas
crederet, ut per eum postea credentem alii magis in fide confirmarentur. Licet enim alii et
uiderint et palparint, non tamen ita diligenter et curiose, ut uulnerum quoque foramina
digitum manumque inferendo scrutarentur. Nihil prętermisit Thomas, quod ad dignoscendam
Dominicę resurrectionis ueritatem superesse potuisset. Nisi uidero — inquit
— nisi
palpauero, sed quia posset esse alius, qui uidetur et palpatur, non esse autem
alium uulnera ipsa, quę in cruce passus est, mihi facient fidem. Deinde dicitur:
Et post dies octo iterum erant discipuli eius intus et Thomas cum eis. Non ante
se iterum eis ostendit quam Thomas desyderio eum uidendi magis fuit accensus. Venit
iterum ianuis clausis. Hinc discimus corpori post resurrectionem immortali facto hoc
ab eo, qui omnia potest, tribui, ut clausa quoque penetret et tamen se uidendum, si opus
fuerit, prębeat mortalium oculis manibusque contrectandum. Mirum id quidem, sed magis
mirandum, quo pacto Dominus cum corpore passibili adhuc atque mortali de Virginis uentre
exierit et uirginitatis integritatem non uiolarit, uel quomodo cum eodem corpore super aquas
ambulauerit et se calcantis pondus elementum tam molle non senserit. Diuina quippe uirtus
uires exuperat naturę. Nec comprehendere* possumus, qualiter id faciat, sed confitemur, quod
faciat, quia, qui facit, potens omnium est omniumque Dominus. Alioquin, qua ratione suam
omnipotentiam nobis indicaret, nisi ea, quę natura non patitur, ipse operaretur? Venit
ergo Iesus ianuis clausis, et stetit in medio, et dixit eis: Pax uobis! Semper est
Iesus in medio seruorum suorum; nunquam deserit Saluator suos dilectores; etiam cum non
uidetur, in medio est. Eisque pacem largitur, ut caro consentiat spiritui et spiritus
obsequatur Deo imperataque eius faciat, dicente Propheta: Pax multa diligentibus legem
tuam, et non est illis scandalum. Hanc habere nequeunt, qui diuina contemnunt.
Non est
pax impiis,
*corr. ex compręhendere
Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
|