Menta.
Me licet infament crudelia tempora Martis,
Non tamen ingrato menta sapore feror.

Ruta.
Ante fores (moneo) rutam suspende virentem,
Ne noceat pueris impia saga tuis.

Lamia.
Quod volitet noctu puerorum lamia pestis.
Ridiculum. Nec me fabula vana movet.

Pimpinella.
Ut Roberte senex gustes innoxia vina,
Pimpinella scyphis innatet herba tuis.

Apium.
Ne tuus exiguos lumbricos sentiat infans,
Florentes apii devoret ille comas.

Basilicon.
Quaere alia, ut primo pascantur Vere iuvenci.
Nam nos deliciis ocima nata sumus.

Coriandrum.
Dum coriandra virent, ea sunt aconita Latinis.
Inficiant ollas haec aconita meas.

Cucurbita.
Sive cucurbitulam, seu me colocynthida dicas,
Febrilis nostra frangitur ardor ope.

Corna.
Grata sumus pueris, et mollem sistimus alvum,
Graius Achaemenides nos lapidosa vocant.

Sorba, et Mespila.
Sorba tibi aestiva carpantur ab arbore. nam nos,
Divitis Autumni mespila poma sumus.

Previous page

Next page

---

Pir, Didak (1517 – 1599) [1596], Cato minor, sive disticha moralia, versio electronica (), versus 5366, verborum 40443, Ed. Neven Jovanović [genre: poesis - carmen; poesis - elegia; poesis - epigramma; poesis - ode] [word count] [didacuspcato].

---