Ad Stephanum Gradium Junii Palmottae Ode.
Gradi, Camoenae grande decus meae,
Non tam corusci lumine sanguinis
Conjuncte nobis, quam perenni
4 Dulcis amicitiae tenore,
En rursus ora sospes ab Itala
Urbi paternae creditus, inclyto
Nuper resolvisti labore
8 Vividus innumeros repostae
Nodos Minervae, discutiens brevi
Sermone, cultique artibus ingeni,
Sagacium quidquid virorum
12 Opposuit studiosa veri
Mens indagatrix, quidquid et abditis
Natura rerum visceribus parens
Recondit, unde omnis Ragusae
16 Te coluit venerata Tellus.
Virtus honori praevia, et integrae
Famae creatrix, pervigiles habet
Ubique plausus, hospitumque
20 Nobilitat generosa mentem:
Hujus corona divite, quae tuo
Praefulget alto consona nomini,
Spectandus incedis per urbes
24 Ausonias, Gradiamque gentem
Ad astra tollis, dum solido gradu
Sectaris artem sedulus auream,
Cui justa cordi, cui nocentes
28 Imperio graviore cura
Froenare notos: sic decet arduis
Humana vitae castra laboribus
Durare, nec molles ad usus
32 Degeneri properare luxu.

Previous page

Next page

---

Palmotić, Junije (1607.-1657.) [1645], Carmina Latina, versio electronica (), 6731 verborum, versus 1094, Ed. Milivoj Šrepel [genre: poesis - ode; poesis - carmen; poesis - epicedion] [word count] [palmoticjcarm].

---