Quod si etiam[ERROR: no link :]54 loca certa notes, queis pergere porro
Fas fuerit vel queis aditus prohibebitur atque
Aerias iterum cursus referetur in auras,
Invenies post aucta aequalibus incrementis
Emensae intervalla viae mutarier ipsas
Usque vices positusque novos sortemque redire.
Haec tibi[ERROR: no link :]55 , si filum certi quodcumque coloris
Junctis excipias vitris atque aere clauso,
Provenient. Quod si frontem deflexeris ipsam
Vitrorum obliquans, variis ut flexibus auram
Lux subeat, vel si vitris concluseris undam
Aut oleae succum aut alios aliosque liquores,
Mutatis semper vicibus reditumque aditumque
Post paria intervalla viae succedere cernes
Alternis. Ast haec ipsa intervalla redibunt
Majora obliquis in flexibus atque ubi vitris
Corpora clauduntur mage pinguia vel mage densa,
Intervalla vices pariter magis ampla requirent.
Sed[ERROR: no link :]56 quoniam nostris non haec sunt usibus apta,
Ut monui, potius variorum fila colorum
Fac subeant punctae transmissa foramine chartae
Ordine quaeque suo. Cernes, ut quodque minori
Mutat iter flexu, obliquo nova corpora motu
Cum subit ingrediens, contra majoribus usque
Intervallorum spatiis gaudere viai
Maximaque in roseo, in violae tenuissima fuco.
His ita tentatis multo[ERROR: no link :]57 jam plura, licebit
Addere nec varias cernentem exurgere formas
Invadet stupor ignarum, quae singula longus
Scrutari labor et Latiis celebrare Camoenis.
De genere[ERROR: no link :]58 hoc illud: non tantum tenve coloris
Si filum admittas, ast ampla aspergine primam
Vitrorum frontem perfuderis atque papyro
Transmissumve jubar sistas retrove repulsum,
Aspicies subito enatas fulgere corollas
Et circumductos radiantibus orbibus orbes.
Queis tamen unus erit color omnibus, ille, per arctum
Admissae lucis tulerant quem fila foramen.

Previous page

Next page