Quid dicam, crasso quantum se corpore tendant
Astra eadem? quid, se circum revolubile dorsum
Quam late effundat? facies quamque extima molem
Inclusam primo condat sub cortice? nempe
Omnia constabunt caelum spectantibus altum:
Nec jam animus cura incertus torquebitur: aris
Ipsa neque Uranie aut votis celebrabitur ullis.
Una comes, dux una viae scrutantibus axem
Cypris erit: illam jam nunc in vota vocare
Incipient; illi sollemnes ducere pompas,
Non ubi se myrti tollit nemus, edita at almae
Templa ubi Doctrinae caput intra nubila condunt,
Palladis egregii juvenes; quorum inclyta nomen
Gestaque victuris sacrabit Gloria fastis.
Adsis o! Cytherea; in te mea desinit Echo;
Quam modo sylvestrem Tyrrheno in litore, ubi Arnum
Aequorae accipiunt laetanti gurgite Nymphae,
Ausus ego ingenuas Musarum educere ad artes. FINIS LIBRI SECUNDI

Previous page

Next page