Hectoris tulero, bis sex et corpora pubis
Iliacae ante pyram, secta cervice, corusco
Mactarim ferro, te ob caesum percitus ira.
Interea ad naves, caput o mihi dulce, jacebis
Sic ut es: affusae circum noctesque diesque
Dardanides cultae sinuosa veste, decorae
Troades et positum flebunt, quas cepimus ipsi
Vique hastaque urbes cum vastabamus opimas.
Haec ait, atque jubet socios circumdare flammas
Magno confestim tripodi; corpusque, cruento 420
Foedatum tabo, tepida perfundere lympha.
Haud mora jussa viri faciunt, aptumque lavacris
Imponunt igni tripodem, purosque superne
Infundunt latices, subterque arentia flammae
Pabula subjiciunt. costas ingentis aheni
Ignis obit; liquor interea calet almus aquai.
Fumidus at resono cum ferbuit humor in aere,
Frigentes lavere undis, oleoque liquenti
Perduxere artus, unguento et lata novenni
Vulnera complerunt. dehinc lecto molle cadaver 430
Impositum, lino tenui texere supremo
A capite ad talos, quam longe tenditur, imos;
Et vestem stravere super candore nivali.
Post haec Myrmidones, cum magnanimo Pelida
Moerentes, noctem luctu, quam longa, trahebant.
Junonem interea conjux fraterque, sedentem
Ad latus, aetherei compellat rector Olympi:
O Juno veneranda, animi laetare: peractum est
Jam tibi opus. fremit arma citus, pugnaeque parat se
Aeacides; Danaos ut jam te suspicer esse 440
Progenitos; tantam impendis queis sedula curam.
Illa sub haec: Quid ais, Saturnie? quod tibi verbum
Excidit ore? viro quod vir mortalis, inopsque
Mentis, totque astu moliri nescius orsa,
Fecerit; hoc nequeam, quae glorior esse deorum
Prima, genus vel quod majus mihi, vel tibi jungor
Quod thalamo, in superos regnum cui contigit omnes?
Talem me irasci frustra, nullasque decebat
Iliacae clades moliri ac funera genti?
Haec inter sese divūm rex, magnaque Juno. 450
Vulcani Thetis interea pervenit in aedes
Astriferas, late fulgentes aere corusco,
Eximias inter divūm tecta omnia, claudus
Ignipotens olim sibi quas construxerat ipse.
Hunc operi intentum, largo et sudore madentem,
Invenit circa folles. nam tempore solers
Bisdenos uno tripodas properabat, in aede
Regali ut starent pariter, pulchris decus ingens
Parietibus; fundoque auratos cuique rotarum
Subdiderat lapsus, in coetum ut sponte deorum 460
Irent ipsa sua, rursusque in tecta redirent
Nulla ducta manu, visu mirabile monstrum.
Jamque opus ingenti cura perfecerat ingens.
Restabant pulchrae, quas nondum aptaverat, aures:
Rite sed aptandis clavos cudebat ahenos.
Haec dum solerti festinat Mulciber arte,
Ecce fores intra veniens sese intulit altas
Pulchra Thetis, niveis fulgens quam candida vittis
Excepit Charis occurrens, Vulcania conjux;
Et dextram dextrae jungit, dehinc talia fatur: 470
O Theti pulchra, pedem nam cur ad nostra tulisti
Limina; diva, soles raro quae visere, quamvis
Cara mihi ante alias, venerandaque? verum age mecum
Huc ades, hospitibus quae par, ut fercula ponam.

Previous page

Next page