Sic ait; atque hastam vibrans intorsit: at illam
Ipsa levi afflatu Pelidae a corpore Pallas
Repulit. acta procul secat auras, et redit, ipsos
Hectoris ante pedes et concidit. acer Achilles 510
Advolat horrendum clamans, trepidumque corusco
Sternere avet telo: deprensum at Phoebus Apollo
Eripuitque manu facili deus, ambiit atra
Et nube. insiluit contra ter dius Achilles,
Ter densam pepulit nebulam. verum, irritus ut se
Immisit quarto furiata mente deo par;
Increpuitque virum, rupitque has pectore voces;
Et nunc fugisti mortem, canis improbe. venit
Te prope namque malum: sedenim servavit Apollo
Raptum iterum; cui vota, reor, facis ante, sonantum 520
Quam subeas strepitum telorum, atque horrida Martis
Praelia. verum alias pugna congressus ad Orcum
Mittam ego te; adjutor si quis deus et mihi pugnas
Inter adest. alios nunc Teucros, obvius ut se
Quisque dabit, saevae pergam demittere morti.
Haec ubi sic fatus, Dryopem rigida ferit hasta
Cervicem in mediam: collapsus decidit olli
Ante pedes. atro sinit hunc in pulvere volvi:
Ipse Philetoriden Demuchum, corpore magnum,
Acrem animis, hasta, succiso poplite, primum 530
Detinuit, stricto invadens dehinc protinus ense
Dulcem animam exemit. duo tam praeclara Biantis
Germina dejecit curru, te Dardane, et una
Tecum Laogonum fratrem; telo eminus illum
Transadigens, gladio te cominus. ocyus inde
Saevus Alastoriden leto dat Troa. furenti
Obvius hic venit, genibus si forte prehensis
Parceret oranti, vivum et dimitteret, aevi
Et miserans florem, haud leto mactaret acerbo.
Demens! nec norat non posse inflectier ulla 540
Arte virum, ingenio haud mitem placidumque, sed acri
Corde trucem ante omnes. dextra hic jam genua tenebat
Suppliciter, precibus cupiens mollire furentem.
Ad jecur ille adigens gladium demersit acutum;
Quod misero ejectum cecidit, nigroque cruoris
Amne sinum implevit: densae involvere tenebrae
Exanimum. rigida aggreditur dehinc Mulion hasta:
Aerea cui geminas cuspis trajecta per aures
Ivit. Agenoridae gladio dehinc torvus Echecli
Ingenti medium secuit caput: omne cruore 550
Purpureo ferrum intepuit: mors ingruit olli
Nigra oculis, duroque immanis numine Parca.
Inde, ubi se cubiti nervi junxere, corusca
Deucaliona ferit per dextram cuspide; mansit
Saucius ille hostem, capitique instantia fata
Praevidit, stricto cervicem perculit ense
Pelides, pulchraque caput cum casside terrae
Dejecit: mediis magna vi excussa medulla
Ossibus exsiluit; jacuit porrectus at ille
Membra solo collapsa. furens, hoc deinde relicto 560
Eximium, Pirei claro de sanguine cretum,
Rhigmum adit, e Thracum nuper qui pinguibus oris.
Venerat. hunc jaculo medium percussit: in imum
Ventrem abiit penitus mucro; curru excidit ille.
At famulo Aeacides vibrantis cuspide teli
Fixit Areithoo dorsum, dum territus acres
Retro vertit equos. moribundo hic corpore nigram
Planxit humum: bijuges turbati, effusaque lora.
Ignis ut arentem per saltum in valle reducta
Cum furit, ac validi miscent incendia venti; 570
Flamma nemus late sese diffundit in omne:
Sic campum superis par vi ruit ille per omnem
Triste manu telum quatiens, turbataque sternit
Agmina: terra madet largo perfusa cruore.
Ac veluti validos cum lata fronte juvencos
Vir junxit, densis qua sternitur aequa maniplis
Area, trituros alba hordea; pressa teruntur
Illa boum pedibus facile: sic fortis Achillei
Alipedum subter pedibus calcantur equorum
Ingentes passim clypeique, et frigida leto 580
Corpora, ferratique axes, orbesque rotarum
Sanguine foedantur: canthi, et rapida ungula rores
Sanguineos spargunt commixto pulvere. saevus
Laudis inexpleto Pelides ardet amore,
Ille madens sudore manus et caede tremendas.