Impulit et Troas, leto quos dius Achilles
Strarat acervatim. ripam hos ejecit in altam,
Mugitum dans horrendum, ceu taurus: at udo
Occuluitque sinu vivos, servavit et imis
Vorticibus pulchri conclusos rite fluenti.
Peliden gravis at circumstetit unda, virumque
Urgebat clypeo incumbens vi concita; stare
Nec pedibus quibat figens vestigia rectis.
Erga amplam ramis diffusam ingentibus ulmum
Arripuit manibus: radicitus exterminata
Illa cadit, lapsu ripam dissolvit et omnem,
Objectu et denso ramorum rauca fluenta
Continuit, pontem jacens transversa per amnem
Praebuit. ast heros medio de gurgite sese
Proripuit; celeri et cursu per plana volabat
Camporum trepidus. nec terga urgere volantis
Ingens interea cessat deus; et ferus atro
Gurgite se attollit supra ruiturus, Achillem 300
Sistat ut a pugna, Teucrisque avertat amicus
Exitium. longe absiluit Peleius heros,
Quam longe volat hasta manu contorta. liquentes
Ut rapido quondam se lapsu nigra per auras
Fert aquila ex alto venatrix, nulla volantum
Quam celeri aut cursu, validis aut viribus aequat;
Sic fert se campo Aeacides. dirum arma sonabant
Quassa humeros circa et pectus: fugit incitus ille,
Obliquatque vias: pone affluit amnis, et alto
Rauca sonans urget fugientis terga tumultu. 310
Caeruleo veluti si quando e fonte colonus
Instat aquam virides rivo ductare per hortos,
Ille unco removens obstantia terga ligone;
Profluit unda levis, subterque illata lapillos
Dimovet; hinc celeri lapsu per prona locorum
Murmurat, ante ipsum ductorem et concita fertur:
Sic magni cursu rapido tumida unda fluenti
Peliden quamvis celerem premit usque liquenti
Et pede consequitur: nec mirum, numina quando
Sancta deum praestant mortali sanguine cretos, 320
Conversa quoties voluit consistere Achilles
Fronte audax, et nosse deis anne omnibus aeque
Infensis pulsus fugiat; Jove natus ab alto
Prolutum toties fluctu labente superne
Urgebat fluvius. moerenti corde repulsa
Ille artus tellure leves tollebat ad auram
Subsiliens: subter magna vi at fessa domabat
Genua fluens cursu obliquo citus amnis; et imis
Subducens pedibus mollem solvebat arenam.
Ergo altum ingemuit, caeloque ardentia tollens 330
Lumina, sic moesto Pelides corde profatur:
Jupiter, ut nullus me divum sustinet alto
Eripere a fluvio, miseroque avertere pestem
Nunc! alias ultro patiar nam quidlibet. his me
Non alius divum quisquam, sed caerula mater
Ipsa malis onerat: quae me lactavit inani,
Oraculo mendax deceptum. nanque sub urbe
Iliaca ajebat periturum, Phoebe, sagittis
Esse tuis. utinam Troum fortissimus Hector
Hanc animam Stygias victor misisset ad umbras. 340
Fortis ego pulchra jacuissem morte; perempti
Exuvias fortis raperet: nunc Parca perire
Indecori leto deprensum in flumine cogit:
Qualem praecelso decurrens monte subulci
Hibernus puerum rapit alto gurgite torrens.
Talia jactanti Neptunus, magnaque Pallas

Previous page

Next page