Valedictoria Ludovici Jellachich de Buzin, Iuris Universi Doctoris, scientiarum politicarum, styli curialis et iuris cambialis professoris in Accademia Zagrabiensi p. o. comitatus zagrabiensis tabulae judiciariae assessoris et facultatis juridicae prosenioris, prout divulgatur, postquam idem D. Jellachich strenue oppugnatum tyronum statutionis meritum, et ad reddendam qualiter peractae deputationis Veronensis rationem in publico provocatos respectivos deputatos (Kussevich nempe et Busan) altissimo jussu cathedra sua, et serius etiam ipso assessoris titulo fuisset privatus: Studiosis juris in annum II-um, suis hucusque auditoribus, ammotus ab officio professor salutem plurimam dicit.

Quandoquidem vobis, auditores charissimi, ex cathedra valedicere non possum, praesentibus id litteris praestare, ad explendas quasvis muneris, quod tredecim, et quod excedit, annis fideliter me gessisse coram vobis saltem, promptissimis ad id testibus, gloriari licet, partes pertinere censeo: quo sic et moderatoris, studiis vestris devinctissimi, memoriam gratam et scientiae, qua absque nec hominem, nec civem esse liquet, contentissimum studium vel hoc ipso, quo vos relinquo, momento vobis amplius etiam ingenerarem.

Principia, quae tenui, a me elucubrata dissertatione hausistis, talia sunt, ut, si iisdem fideliter inhaeseritis, nihil amplius sive Patria sive Princeps desiderent. Colite illa, ut thesaurum, quem non ego, sed tota retroacti temporis tristis perinde, ac jucunda collegit experientia, nec sinite, vos ulla ab iisdem dimoveri authoritate.

Previous page

Next page

---

Jelačić, Ljudevit (1792-1851) [1824], Valedictoria, versio electronica. (), 1148 verborum, Ed. Franjo Fancev [genre: prosa - epistula] [word count] [jelaciclvaledictoria].

---