Čobarnić, Josip (1790-1852) [1835], Dioclias carmen polymetrum, versio electronica (, Split; Zadar; Makarska), Versus 2345, verborum 17608, Ed. La Redazione del Bullettino di Archeologia e Storia Dalmata [genre: poesis - epica; poesis - carmen; prosa - vita; prosa - praefatio; prosa - adnotationes] [word count] [cobarnicjdioclias].
-- 19 --
Videt puellam denotatque Caesari
Dirus minister, horridusque carnifex.
Comprensa Virgo clauditur mox carcere.
Quae turpis ira, quis furor teterrimus
Te cogit in sororem atroci cuspide
Saevire Caesar [8] omnium dirissime
Manusque fraterno inquinari sanguine?
Quae saeva rupes Africae te prodidit ;
Vel quae leena lacte nutrivit suo ;
Leone saevior, vel ipsa tigride?
Nempe Dioclis imperantis filia
Fratris peribit diriori dextera
Qui te vocavit filium, qui Caesarem?
Sic ergo gratias rependis barbare!
Coelestis ira mors manet te perfide.
Interea Caesar rabie furibundas acerba
Jusserat innocuum manibus post terga revinctis
Ciriacum ante suum, facinus miserabile, currum
Diripier ; veteris Capitolia ad alta Quirini
Ipse triumphali pompa conscendit et omnis
Ordo virûm, fremitu dum dat tuba signa secundo
Incedit ; nitidis fulgent longa agmina in armis
Formidatae equitum turmae, peditumque phalanges
Praecedunt aquilasque agitant, plaususque secundant.
Progreditur grandi exaltans gravitate Senatus
Ecce trahit sonipes niveo candore quadrigam,
Qua novus adscendit Caesar, nova sceptra superbus
Augurat et toto captum moderamen in orbe.
Ipse catenatus, plebis lacrimabile probrum,
Adstat Ciriacus trepidanti corpore, ad astra
Sanguineos tollens oculos, signansque propinquum
Jam finem vitae, liceat quo gaudia coeli,
Angelicos inter coetus sibi certa subire,
Čobarnić, Josip (1790-1852) [1835], Dioclias carmen polymetrum, versio electronica (, Split; Zadar; Makarska), Versus 2345, verborum 17608, Ed. La Redazione del Bullettino di Archeologia e Storia Dalmata [genre: poesis - epica; poesis - carmen; prosa - vita; prosa - praefatio; prosa - adnotationes] [word count] [cobarnicjdioclias].
|
