Belligera accurrit tunc denique turba virorum,
Undique et invadit Dervisum, sternat ut illum, 270
Parcite sed, comites, clamat Vezirus, et uni
Mi sinite istius servetur gloria lethi.
Protegit hinc hostem fortis defensor, et ictus
Exceptans clypeo fato hunc subducit acerbo.
Dervis at inspiciens se iam exegisse, reposcit 275
Strenuâ quod virtus, pugnâ hac extrema malorum
Expectanda sibi, retro vestigia ferre
Nititur arma inter, stricto protectus et ense,
Evasit donec, minus alta ubi moenia surgunt.
Saltu hîc desiluit, sociis se iunxit et armis. 280
Hoc ausu attonitus clamat Dilaver in altum
Extolli credis, dum sic descendis ad ima.
Irâ indignatus Dervis respondet acerbâ,
Altius adsurgam, iuvat hîc descendere ab alto.
Te lapsum at video, quin ullo tempore surgas, 285
Viscera telluris, vel te edita moenia condant.
Alter at excepit, mentiris, dire rebellis,
Haud mea clara fides te morte tuebitur usque;
Suscipit ille, modo disces si vera loquutus,
Urgere et properat Vezirum moenibus altis. 290
Ipsum sed cohibet vi factâ urgente Dautes,
Expecta paulisper, ait, dum fata recludant,
Cuiusnam imperium mage culmine decidat alto.
Eia agite, o socii, quisquis me pone sequatur
Pergat Caesaream nulla mora, pergat in aulam, 295
Et potiamur avi, quam condunt aurea claustra,
Cui caput in manibus, proculcat caetera plantis,
Hîc silet, igniferi colubri sub imagine dirâ.
Et ruit ad muros regalis turbidus aulae,
Aggrediens valido convellere robore portas. 300

Previous page

Next page