Aula, tibi? Tantum sceleris patrabis iniqui,
Vt dedignetur nobis rescribere princeps
Et neget alternam per mutua scripta salutem?
Parce tamen, parce, o, fastu temerare profano
Virtutum exemplar, specimen probitatis, amusim
Iustitiae et normam, fidei senioris asyllum.
Tu quoque torpentes, Ignauia, parce per arctus
Serpere, Desidiaeque nefas: cui publica cura est
Credita, non illum senio marcescere fas est.
Quod nisi, Segnities, tumidoue Superbia uultu,
Obstiteris, responsa uiam cursumque uorabunt
Allatura nouum absentis solamen amici,
Et uicibus crebris uia puluerulenta teretur
Flamminiae et nostri documentum ostendet amoris
Littera longinquum non fraudatura clientem,
Sed blando affatu semper reditura uicissim.
Quaeque suo sese sermone reciproca pensat,
Semper inexpletos iterabit epistola cursus,
Scribendi officio nec me certasse pigebit.