In CroALa inventa

Est mibi regnum tenuis peculi,
Quippe virtutum meritis honestum,
Ut rogans ad me libeat venire,
Numen adoro."
Ille rescripsit: "Nimium beatus
Credulus nostri minime videndo.
Ipse complebo veniens ab alto
Velle paternum.
Sede praecaelsa residens Olympi
Ipse curabo dare tunc Thadaeum,
Qui tibi curam dabit et perennem,
Crede, salutem."
Denique ad regem veniens Thadaeus
Optimis curis penitus refecit.
Nuncians: porto sacra missa caelo,
Clausit ocellos.

DE DIVO MATTHIA
Ad viam vitae simul et salutis
Proditor Iudas fuerat vocatus,
Perditum calcans iter et prophanum
Sed ruit aeger.
Vendidit nummo dominum polorum,
Filium patris solio sedentis
Aureo caeli, laqueoque fregit
Guttur iniquum.
Matthias missi meruit tribunal
Sorte divina, numerandus ipse
Milites inter domini probatos
Aegregiosque.
Fecerat Iudam reprobum voluntas
Prava, quam numquam dominum secutus
Liquerat, furti loculos habebat
Proditor atrox.
Matthiam fecit domini secutum
Dona perfelix animus probatum,
Lampadem vitae meruit videre
Mortis in umbra.

Šižgorić, Juraj (c. 1445-1509?) [1487], Odae de apostolis, versio electronica (), 526 versus, verborum 2640, Ed. Veljko Gortan [genre: poesis - oda; prosa oratio - epistula] [word count] [sisgorgodae].