Marulić, Marko (1450-1524) [1503], In epigrammata priscorum commentarius (), Verborum 25316, Ed. Bratislav Lučin [genre: prosa oratio - commentarius] [word count] [marulmarinepigr].
I.3. Tametsi sciam non defuturos qui super eadem ista iam pene exesa obsitę uetustatis
monumenta, quę tibi nunc instaurare noua interpretatione aggredior, aliter atque aliter et
sentient et enarrabunt, nihil id equidem moror: libere proferant in medium siquid
probabilius uerique similior inuenerint. Neque pudebit me unquam neque pigebit discere
quod nesciam, sed ab illis dumtaxat quos in docendo, ut prosint aliis, cura solicitat, non
quos alieni operis malignus liuor torquet. Sincere simpliciterque cuncta diiudicanti et
quę propiora uero sunt promenti gratias agam. Inuidis autem ingenue respondebo scripta
hęc, quę ipsi cauillantur, tibi placuisse, cui scripta sunt, si modo placuerint.
Marulić, Marko (1450-1524) [1503], In epigrammata priscorum commentarius (), Verborum 25316, Ed. Bratislav Lučin [genre: prosa oratio - commentarius] [word count] [marulmarinepigr].
|