Marulić, Marko (1450-1524) [1503], In epigrammata priscorum commentarius (), Verborum 25316, Ed. Bratislav Lučin [genre: prosa oratio - commentarius] [word count] [marulmarinepigr].
V.3. Gloriosum est profecto aduersariorum conatibus reluctari, reluctando superare,
superando uel tropheum uel ouationem uel triumphum demereri; nulla tamen gloriosior est
uictoria quam se ipsum uincere et affectibus imperare, et non ea quę corporis uoluptas
suggerit facere, sed quod lex pręcipit diuina: illud meditari, illud exequi uelle, ad
illud perficiundum tota animi affectione niti atque contendere. Eos enim qui sic agunt non
terrena manet remuneratio, sed cęlestis, non laus in marmore incidenda uel in chartis
describenda, sed illa inęstimabilis atque ineffabilis gloria in cęlesti regno perpetuo
permanenda diuinęque destinationis immobilitate stabilienda, neque minuenda unquam neque
finienda. Non hanc acceperunt ueteres Romani, non Carthaginenses, non Macedones, non
Athenienses, non Thebani, non Lacones, non alię nationes quę -- 63v -- diu multumque
dominatę sunt, quoniam quos uera latuit religio, ueri boni mercede indigni fuerunt.
Marulić, Marko (1450-1524) [1503], In epigrammata priscorum commentarius (), Verborum 25316, Ed. Bratislav Lučin [genre: prosa oratio - commentarius] [word count] [marulmarinepigr].
|