Marulić, Marko (1450-1524) [1507], Vita diui Hieronymi, versio electronica (), Verborum 10681, Ed. Darko Novaković [genre: prosa oratio - vita] [word count] [marulmarvita].
Pręterea quanta illi ingenij promptitudo, quanta dictandi facilitas
affuit, ex dictis eius discere possumus, ita ut quędam diu multumque
meditatum crederemus, nisi ille ex tempore prolata atque ędita fassus
fuisset. Libellum ad Fabiolam, in quo longo disertoque sermone de
uestibus Pontificis ac sacerdotum, de tabernaculo uasisque sacrificij
pertractans tropologiam eorum explanat, sic concludit, ut dicat:
Hęc ad unam lucubratiunculam, cum iam funis solueretur a littore et
nautę crebrius inclamarent, propero sermone dictaui quę memoria
tenere poteram, et quę diuturna rationali pectoris mei lectione
concesseram, satis intelligens magis me loquendi impetu quam iudicio
scribentis fluere et more torrentis turbidum proferre
sermonem.
Marulić, Marko (1450-1524) [1507], Vita diui Hieronymi, versio electronica (), Verborum 10681, Ed. Darko Novaković [genre: prosa oratio - vita] [word count] [marulmarvita].
|
