Croatiae auctores Latini: inventa |
domum | qui sumus | textus | auxilia | tolle, lege! | |
Marulić, Marko (1450-1524) [1507], Vita diui Hieronymi, versio electronica (), Verborum 10681, Ed. Darko Novaković [genre: prosa oratio - vita] [word count] [marulmarvita].
De laudibus diui Hieronymi carmen
Delmatię lętis olim generatus in oris Hieronymus toto notus in orbe fuit. Inter Catholicos unus facundior omnes, Iudice me, magno nec Cicerone minor. Cecropia doctus lingua, doctusque Latina, (5) Hebraicos didicit, Chaldaicosque sonos. Felix tam uarię donis donate loquellę! Ingenio multum, nec minus arte ualens. Te Scripturarum castigatore, recessit omnis ab utroque menda fugata libro. (10) Te monstrante patent sensus et enygmata uatum, Iam licet obscuris nil titubare locis: Sic Sole infuso tenebras uanescere noctis Cernimus, et nubes flantibus etesijs. Te bellante pijs uerterunt terga prophani, (15) Perpetuus nostris hostibus hostis eras. Te duce, prostratis erroribus, alma triumphat Ecclesia, et laudes concinit usque tuas. Tu nobis consulta, modos monitusque dedisti, Per quos alta poli scandere ad astra datur. (20) Nec tamen ista magis uerbis, calamoque docebas, Quam uita et factis, uir memorande, tuis. Nam Latium linquens Syrię deserta petisti, Sacco membra tegens esurieque domans. Illa angusta specus muscoque uirentia saxa, (25) Nudaque paupertas assiduusque labor, Cur sint, Roma, tuis tectis pręlata superbis, Cur tot diuitijs delitijsque tuis? Noscere si cupias, rerum metire suprema, Et causam disces finis ab indicio. (30) Ille etenim potuit qui talia spernere multa, Contentus paruo, nunc bona summa capit. Nunc fruitur cęlo, sed quo quoque tempore terras Incoluit, mira dote beatus erat: Mentis enim leuibus transcendens ęthera pennis, (35) Non semel angelicos fertur adisse choros, Et sanctos uidisse patres, uidisse sedentem Fulgentemque super culmina summa Deum; Sępe supernarum pastus dulcedine rerum Ieiunus totas perstitit hebdomadas; (40) Illi terribiles se submisere leones, Nec dedignati sunt sua iussa sequi. Nullus tunc domitor, uis nulla subegerat illos, Et caput imperio supposuere suo. Grande uiri meritum, cui grex quoque mutus honorem Pręstitit, et sęuę quem coluere ferę. Grandius hoc tamen est: illius nomina diri Demones horrescunt effigiemque cauent; Illi uota homines persoluunt sępe periclis, Sępe graui erepti protinus exitio. Ossa uiri, Solymis defuncti, Roma recępit: Illius meritis hoc quoque credo datum. Christus namque mori Solymis elegit et idem Ecclesię Romam pręstitit esse caput.
Marulić, Marko (1450-1524) [1507], Vita diui Hieronymi, versio electronica (), Verborum 10681, Ed. Darko Novaković [genre: prosa oratio - vita] [word count] [marulmarvita]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Podatke o projektu vidi na www.ffzg.hr.
Za uporabe koje prelaze okvire ove licence obratite se na http://www.ffzg.unizg.hr/klafil/dokuwiki/doku.php/z:digitalizacija-hrvatskih-latinista.