Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
Offensus tam iniquo responso Pilatus dicit eis: Accipite ergo eum uos et secundum
legem uestram iudicate eum! Quasi diceret: Si ordinem recti iudicii peruertitis, uos
potius iudices eius sitis, ut uestra, non mea culpa pereat, qui uestram in eum criminationem
discuti non permittitis. Dixerunt Iudei: Nobis non licet interficere quenquam. Os
uestrum condemnat uos, o Iudei. Non negatis uobis non licere interficere quenquam. Et tamen
interfici poscitis innocentem. Si ergo uobis non licet interficere, certe nec interfici
quenquam uelle licet. In illorum autem manibus, qui crucifigunt, qui supplicio afficiunt
Iesum, uestra est -- 467 -- u oluntas, uestra mens, uester animus. Nequaquam illi
interficerent, nisi uos, ut interficiant, instaretis. Facitis itaque, quod uobis non licere
facere confessi estis. Quin etiam, quo facilius id factum impetretis, quędam crimina, iuxta
alios Euangelistas, obiicere conati estis, nequid intentatum relinqueretis ad rem celerius
perficiendam, quam inique decreuistis.
Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
|