Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
Sacramentum autem baptismi totius Trinitatis donum est. Credentes quippe et baptizatos
Pater suscipit, Filius diligit, Spiritus Sanctus uiuificat. Trium tamen personarum una
substantia est, concors operatio, eadem uirtus. Deus ergo trinus et unus, quos creauit ad
uitam, recreare dignatur ad salutem. At etiam baptizatos docere Dominus iubet dicens:
Docentes eos seruare omnia, quęcunque mandaui uobis. Ante baptismum ergo
docentur, quę credenda sunt, post baptismum, quę facienda. Scriptum est autem: Iustus ex
fide uiuit. Ergo, ut uitam, quę per Christum promissa est nobis, recipere mereamur,
copulanda est cum fide iustitia. Pueris uero, qui baptizati absque iustitię operibus decedunt,
sufficit innocentia ad salutem, quia iustificati sunt per Mediatoris passionem, ita ut, quod
in origine amiserant, in baptismo consequantur.
Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
|