Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
Sedet a dextris Dei, uiuorum ac mortuorum iudex futurus. A dextris autem Dei sedere est
ęqualem Deo esse. Aequalis est enim Patri Filius, non in humanitate assumpta, sed in maiestate
propria. In substantia quippe diuinitatitis non est aliud Pater, aliud Filius, quanuis in
personarum distinctione alius sit Pater, alius Filius. Nec putes Patrem ad leuam Filii sedere,
quia Filius ad dexteram Patris sedet. Hoc hominibus conuenit, non Deo, qui spiritus est, et
non membris dignoscitur*, sed uirtute. Sicut ergo Filius a dextris Dei Patris, ita et Pater a
dextris Filii sedet, cum omnia in Deo dextra sint, sinistrum nihil. Hoc Propheta psalmo
centesimonono testatur dicens: Dixit Dominus Domino meo: Sede a dextris meis.
Dominus Domino — Pater Filio. Et rursum Patrem a dextris Filii residere asserit, dum
ait: Tu es sacerdos in ęternum, secundum ordinem Melchisedech. Dominus a dextris tuis.
In hoc itaque ostenditur coęqualem esse Patri Filium, sicut et in eo, cum dicit:
Ego in Patre, et Pater in me est. Et: Qui uidet me, uidet et Patrem
meum.
Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
|