Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
Modis omnibus nititur Dominus probare suam resurrectionem seque et Deum et hominem
demonstrare; Deum, quia, quod illi intra se cogitabant, nouerat, et quia foribus clausis in
domum penetrauerat, quod quidem fieri nisi diuina uirtute non potuit; hominem, quia corpus
uisibile et palpabile se habere ostendit, et uulnerum, quę in cruce passus fuerat, cicatrices
monstrauit. Ac non sum — inquit — spiritus; homo sum carne et ossibus constans. In his reuersa
anima mortuum corpus uiuificauit, uiuificatum diuinitas nunquam ab eo discedens glorificauit,
ne deinceps pati uel mori posset. Gauisi sunt ergo discipuli — ut Ioannes ait
— uiso Domino. Veruntamen adhuc quibusdam — sicut scribit Lucas —
non credentibus et mirantibus prę gaudio dixit: Habetis hic aliquid, quod manducetur?
Quasi diceret: Non creditis uisui, non creditis tactui, et me spiritum putatis.
Spiritus cibo non utitur. Saltem cum manducantem uideatis, me uerum corpus habere credite.
Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
|