Crijević Tuberon, Ludovik (1458-1527) [1520], Commentariolus de origine et incremento urbis Rhacusanae, versio electronica (), Verborum 5404, Ed. Vladimir Rezar [genre: prosa oratio – historia] [word count] [tuberocommrhac].
Iam duos annos Demiani tyrannis expleuerat grauisque ea non caeteris magis quam
his, qui affinitate atque cognatione tyrannum contingebant, esse coeperat,
libertatis amore necessitudinis iura superante. Itaque Pyrrhus Benessa, tyranni
ipsius gener, aduocatis clam domum suam e Rhacusano senatu potioribus et qui
Demiani tyrannidem molestius ferebant, accusat socerum iniustitiae, quod
scilicet ui patriae illata ciues suos oppressisset, et cum quibus aequo iure
uiuere deberet, his dominaretur, profiteturque principem se fore libertatis
recuperandae. Vbi Benessam soceri tyrannidem auersantem animaduertunt qui huic
concioni interfuerant, fidesque dictis eius habita est, omnes ad recuperandam
libertatem excitantur. Sed quia animis mercatura, cui soli studebant,
effoeminatis nihil fortitudinis inerat, non ausi per se tyrannum aggredi
maluerunt externa ope aduersus illum uti quam propriis armis in libertatem sese
uindicare. Itaque ueluti indigni qui suis legibus uiuerent id consilii
coeperunt, quo quidem neque ipsi seruitutem effugerunt et patriam alienae
ditioni subiicientes sibi pariter et posteris suis perpetuam inusserunt notam.
Crijević Tuberon, Ludovik (1458-1527) [1520], Commentariolus de origine et incremento urbis Rhacusanae, versio electronica (), Verborum 5404, Ed. Vladimir Rezar [genre: prosa oratio – historia] [word count] [tuberocommrhac].
|