Marulić, Marko (1450-1524) [1522], Tropologica Dauidiadis expositio, versio electronica (), Verborum 5871, Ed. Neven Jovanović [genre: prosa oratio - expositio] [word count] [marulmartrop].
Famem triennem sustinet populus pro Saulis crimine, qui contra Iosuę
iusiurandum occidit Gabaonitas. Dauidis iussu satisfactum est Gabaonitis, septem
hominibus traditis de genere Saulis, in quibus duo filii erant Saulis ex Respha
coniuge. Hos illi suspendio necauerunt. Respha ab [note] eis non recessit, donec
sepelirentur. Gabaon interpretatur uallis moestitię, Saul abutens, Respha currens
uelox. Saul abutens foenerator est. Domestici Saulis foeneratoris hęredes sunt, qui
et Resphę
filii sunt, id est auaritię. Quę
ideo uelociter currens dicitur, quia cito
eos ditat, qui foenore non abstinent. Sed quoniam foenore parta restitui debent
spoliatis, qui Gabaonitę, hoc est uallis moestitię, appellantur, quia supra sortem
usuram soluendo tristantur, noster ergo Dauid Christus tradit illis foeneratoris
hęredes, qui male partam hęreditatem dispensare neglexerunt. Et ipsi eos
suspendere dicuntur, quia ipsorum causa damnantur. Respha, id est auaritia, mater
usque ad suspendium eos comitatur. Quibus damnatis fames cessat in populo, quia
sublata usura et illicitis contractibus legis poena repressis, cessat auri sacra fames,66
ex qua omne malum oriri solet.
Marulić, Marko (1450-1524) [1522], Tropologica Dauidiadis expositio, versio electronica (), Verborum 5871, Ed. Neven Jovanović [genre: prosa oratio - expositio] [word count] [marulmartrop].
|