93. ad Michaelem Lipeum, Traguriensem
Accidisset si te facientem uerba, Lipee,
Exciperet plausu Tullius illa suo.
Si noscet quanto scruteris acumine uerum,
Diceret: "hic callet dogmata nostra" Plato.
Si quoque uidisset qua praestas arte medendi,
Te sobolem Phoebus crederet esse suam.
Ipse tuos etiam si possit cernere mores,
Vt puto, non alios uellet habere Cato.
Felix quem praesens et postera conferet aetas
Ingenio claris et pietate uiris.