Dudić, Andrija; Dionysius Halicarnassensis (1533-1589) [1560], De Thucydidis historia iudicium... A. Duditio interprete (), Verborum 18906, Ed. Petra Šoštarić [genre: prosa - epistula; prosa - versio] [word count] [dudicathucydid].
Quibus rebus superiores historicos excelluerit.
superiores quidem historicos duabus rebus excelluit: una, quod scribendi
argumentum delegit neque simplex omnino, ex uno tantum quasi membro formatum; neque
valde permixtum, in multa atque incongrua capita dissectum: altera, quod fabulosum in
suos libros nihil induxit, neque in eam partem deflexit, ut multitudini fraudem, et
tamquam imposturam faceret. quo in genere superiores omnes peccaverant: qui lamias
commemorarunt nescio quas in silvis et saltibus, e terra prodeuntes; et Naidas in
terra atque aqua pariter degentes ab inferis profectas, pelago innatantes, semiferas,
cum hominibus coeuntes, et ex mortali divinoque concubitu semideam sobolem, et alia
quaedam, quae nostra aetas, ut incredibilia planeque delira, contemnat. Neque vero ut
haec dicerem, eo sum adductus, quod illos viros accusem; quibus etiam veniae multum
tribuo, si, cum in explicanda nationum et locorum historia versarentur, fabulosa
figmenta receperunt: quandoquidem apud omnes homines, tum communiter de locis, tum
proprie de urbibus, monumenta quaedam servabantur huiusmodi, quas dixi, rerum,
auditione perceptarum: quas filii a patribus acceptas suis deinde posteris ut
traderent, elaborarunt. quod siqui litteris eas consignare vellent, ab his ut ita
plane exponerentur quo modo de veteribus acceperant, dignum putabant. quapropter
illos viros, ut locorum descriptiones fabulosis additamentis variarent, atque
distinguerent, necessitas compulit. Thucydidem autem, qui materiam unam ad scribendum
cepisset earum rerum quibus ipse affuerat, theatrales ludificationes in narrationem
inducere non decebat; neque se ad eum errorem quem eiusmodi scripta sua sponte parere
consueverunt, sed potius ad utilitatem legentium accommodare: quod ipse in historiae
prooemio testatum reliquit: quo in prooemio haec scripsit ad verbum: Et auditu
quidem, ut quaeque pars fabularum expers in ipsis est, ita minus iucunda fortasse
videbitur. quicumque autem et praeteritas res, et quantum humano consilio licet,
etiam futuras, praeteritis similes, considerare, planeque inspicere voluerint, his,
dum illa utilitatem pariant, satis erit. emolumentumque potius, quod semper idem sit,
quam spectaculum, quod in praesenti tantum oblectet, in scribendo cogitamus. Ac de
ipso quidem, et philosophi, et oratores omnes, aut, si non omnes, plerique certe, ita
consentiunt; de retinenda veritate, cui consecratam esse historiam volumus, plurimum
laborasse; nihil
-- 245 --
addidisse rebus, quod iustum non esset; nihil detraxisse;
Dudić, Andrija; Dionysius Halicarnassensis (1533-1589) [1560], De Thucydidis historia iudicium... A. Duditio interprete (), Verborum 18906, Ed. Petra Šoštarić [genre: prosa - epistula; prosa - versio] [word count] [dudicathucydid].
|
