Croatiae auctores Latini: inventa  
   domum |  qui sumus |  textus |  auxilia |  tolle, lege! |   
Palmotić, Junije (1607.-1657.) [1645], Carmina Latina, versio electronica (), 6731 verborum, versus 1094, Ed. Milivoj Šrepel [genre: poesis - ode; poesis - carmen; poesis - epicedion] [word count] [palmoticjcarm].
Previous section

Next section

Ad Stephanum Gradium Junii Palmottae Ode.
Gradi, Camoenae grande decus meae,
Non tam corusci lumine sanguinis
Conjuncte nobis, quam perenni
4 Dulcis amicitiae tenore,
En rursus ora sospes ab Itala
Urbi paternae creditus, inclyto
Nuper resolvisti labore
8 Vividus innumeros repostae
Nodos Minervae, discutiens brevi
Sermone, cultique artibus ingeni,
Sagacium quidquid virorum
12 Opposuit studiosa veri
Mens indagatrix, quidquid et abditis
Natura rerum visceribus parens
Recondit, unde omnis Ragusae
16 Te coluit venerata Tellus.
Virtus honori praevia, et integrae
Famae creatrix, pervigiles habet
Ubique plausus, hospitumque
20 Nobilitat generosa mentem:
Hujus corona divite, quae tuo
Praefulget alto consona nomini,
Spectandus incedis per urbes
24 Ausonias, Gradiamque gentem
Ad astra tollis, dum solido gradu
Sectaris artem sedulus auream,
Cui justa cordi, cui nocentes
28 Imperio graviore cura
Froenare notos: sic decet arduis
Humana vitae castra laboribus
Durare, nec molles ad usus
32 Degeneri properare luxu.

-- 16 --


Hac arte Patri fit similis Deo,
Scanditque penna praepete sidera
Mortalis, et nigrae tremenda
36 Intrepidus necis arma ridet,
Visens Eoi limina cardinis,
Phoebique claras occidui domos,
Pigroque subjectas Booti,
40 Quasque niger premit aestus oras.
Felix! decoris cui favet optima
Fortuna votis, quem sapientium
Doctis honorandum catervis
44 Inserit ingeniosa virtus.
At me hoc carentem munere detinet
Foecunda diris Insula viperis,
Foecunda sylvis, duplicique
48 Grandiloqui memoranda semper
Pauli periclo, fama licet loquax,
Fictique cornix garrula gentibus
Hos reddat externis honores
52 Arbitrio popularis aurae.
Juris sed alti filia Veritas
Sacro suarum numine virium
Invicta lucet, credulumque
56 Despicit imperiosa vulgus.

Previous section

Next section


Palmotić, Junije (1607.-1657.) [1645], Carmina Latina, versio electronica (), 6731 verborum, versus 1094, Ed. Milivoj Šrepel [genre: poesis - ode; poesis - carmen; poesis - epicedion] [word count] [palmoticjcarm].
Powered by PhiloLogic

Creative Commons License
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom
Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Podatke o projektu vidi na www.ffzg.hr.
Za uporabe koje prelaze okvire ove licence obratite se na http://www.ffzg.unizg.hr/klafil/dokuwiki/doku.php/z:digitalizacija-hrvatskih-latinista.