Stephanus Gradius Junio Palmottae S. P. D.
Non ita Penelopen laetus respexit Ulysses
Dardania et crudo victor ab Antiphate;
Nec tantum reduci gavisa est Athica Theseo,
Liber ubi infernae stagna renavit aquae;
5 Nec quae post decimam ducta est victoria messem,
Laetitiae Danais munera tanta dedit;
Quantum quae Illyricis mihi venit Epistola ab oris,
Tristitiae et curis unica cura meis.
Ilia vel amisso Thetydem placasset Achille,
10 Et tristem ad cineres Hectoris Andromachen.
Forte mali causam quaeris. Me Tibridis ora.
Qui pomis servat nomina, Campus habet:
Jamque abit herbosis nix tertia collibus, et jam
Tertia anhelantes bruma remittit equos;
At me nulla dies hic lumine vidit amico,
15 Laetaque adhuc votis non fuit hora meis.
Quid gemuit Danais Hecube captiva ? requirit,
Discere, quid patiar, si quis amice cupit:
Seu quid Threiciis recubans Philomela sub umbris,
Movit ubi ultores texta querela Deos?
20 Sed male degeneres tardent haec, ardua virtus
Namque amat et domino despicit ima pede.
Hanc ego Niliaci sequerer per inhospita fontis,
Qua Phaetonteos Africa signat Equos;
Nec me Sarmatiae teneant juga, cum vagus alta
25 Concretas glacie continet Ister aquas.
Hac sine Saturno sub Praeside fas fuit, aurea
Inter sylvestres ducere saecla Deos,
Pinguia cum nullis vertentibus arva juvencis
Sponte sua melior cuncta ferebat humus:
30 Dives erat nemo, nec parvo assueta Juventus
Externas bello poscere novit opes.
Auri insana fames, et avarae insania mentis,
Ad quod non homines cogis, iniqua, scelus !
Antevolasse ferunt solitam Scheneida ventos,
35 Cum timuit vetito fata sinistra thoro.
Aonio sed enim juveni congressa, citatum
Aurata ad Veneris munera flexit iter.
Nec minus, aerato quae cum fuit abdita muro,
Visa sat aeratio tuta puella seni;
40 Insolitus postquam tectum circumstetit imber,
Dicitur aurifero non renuisse Jovi.

-- 38 --

Auro etiam poscente Notos in vela vocavit
Argus, et invitum per mare fecit iter,
Quum profugam cupiens Colchis avertere pellem
45 Proelia discussa sevit Iason humo.
Primus hic unanimes mortali e pectore sensus,
Nativi Studium deposuitque soli;
Concordesque animas alterni luce fruentes
Colloquii rigidis dissociavit aquis.
50 Me quoque, Dalmatico teritur qui littore, pontile
Vicinum Vati non sinit esse meo.
Hunc docto auritas facientem carmine quercus
Confecta invenies, Littera nostra, via,
Qua nemora Adriacis Melite sua cernit in Undis,
55 Multaque nativos claudit arena lacus.
Neve rudem pudeat doctis occurrere Musis:
Defectus facilis corriget ille tuos.
Vade age; et hanc (Junio referes) tibi ferre salutem
59 Romana Gradius jussit ab Urbe tuus.