46.
At populi fremitum, matrumque immota querelas
Sustinet Herodis rabies: dare funera saevus
Imperat atque omnes scrutari cuspide cunas.
Saevit atrox ferrum primusque effusus in urbem
Ardor Ephrataeam; fusa hinc per rura, per agros,
Oppida barbaries plusquam vicina fatigat.
Quis matrum lacrymas, luctus, puerosque virile
Servandi studium, natorum infausta praeire
Impavidas quam fata sequi, quis inania iusto
Aequabit lamenta sono? Non si mihi Sulmo
Arcanos reseret, non si mihi Mantua fontes.