Croatiae auctores Latini: inventa |
domum | qui sumus | textus | auxilia | tolle, lege! | |
Baričević, Adam Alojzije (1756-1806) [1780], Eclogae, versio electronica (), Verborum 2018, Ed. Olga Perić [genre: poesis - ecloga] [word count] [baricevaaeclog].
Ecloga qua deplorat rusticus grandine concussam vineam
Jolas, Mycon et hujus filii Quid lacrymis sic assiduis Tibi lumina manant, Chare Mycon, quidue hoc gemitu sic pectora rumpis? Ah miser! Ignoras, teneras mihi grandine vites Concussas, grauidos fructus et laeta quotannis Munera praebentes? Trunci, ah, stirpesque valete! Manate, o lacrymae, gemitusque aperite dolorem! Nam quid nunc operi incumbam? Quid vana labore Membra teram?—Grati fructus periere laboris. Fata tibi meliora Deus! Sat lumina, sat iam Exhaustae maduere genae; suspiria quorsum? Ah quis contineat media vel pace dolorem Iacturae memor, heu, mecum tolerare labores, Solari et tristes animo depellere curas? Uva perit!—Superi, rapuistis nostra laboris Ecce leuamina! Iam proles quoque tollite; postquam Nil reliquum est, dulcem nequeunt producere vitam. Quid querulas frustra voces ad sidera iactas? Unum est solamen meminisse et dicere cladem. Immisere Dii, quibus hoc placuisse videtur. Deploranda dies nobis carbone notanda In cella, nostro vinum quae tollit ab ore. Conditur atra dies, caelo nox horrida surgit. Condatur sane, fastisque ex omnibus absit. Lux fuit! Heu tristi lux infensissima clade; Nubila, lurida, squallida, tetrica, terribilis lux!
Baričević, Adam Alojzije (1756-1806) [1780], Eclogae, versio electronica (), Verborum 2018, Ed. Olga Perić [genre: poesis - ecloga] [word count] [baricevaaeclog]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Podatke o projektu vidi na www.ffzg.hr.
Za uporabe koje prelaze okvire ove licence obratite se na http://www.ffzg.unizg.hr/klafil/dokuwiki/doku.php/z:digitalizacija-hrvatskih-latinista.