Adam Barichevich Jacobo Penzel s. p. d.
Labacum
Jamdudum ad Te litteras dare statueram, vir optime, ne existimares, Te ex animo
meo excidisse. Sed ab hoc officio cohibuit me nuncius de subita profectione tua
Aemonensi ab urbe. Facit tamen mea erga Te amoris magnitudo, ut, cum isthuc
Zagrabiensis quidam civis iter haberet, eum sine mea epistola Labacum venire
noluerim, periculum facturus, an reipsa iam alio profectus sis.
Caeterum ubicumque terrarum sedem figes fortunarum tuarum, DEUS te
incolumem ac nobis amicum diu servet, quod profecto intelligam ex frequentiore
missione litterarum, quae semper, ut adhuc, gratissimae accident.
Vale
Zagrabiae XVIII. Kal. Mayas MDCCXCIX.
