XXI.

Illyr. Olli Kucku ubj, olli ſcjarni raſbi.

Aut canem perime, aut molam frange.

Canis farinam comedens.

Frumenta saxo cum molari frangeret
Mopsus quotidie, insuavis ob damnum labor
Fiebat, avide nam Canem furfur sibi
Vorare sensit, inque furti crimine
Deprensae attrivit fuste nodoso latus.
Nil facta proprio sanior Canis malo
Ad furfur iterum fecerat viam sibi,
Experta domini saeva rursus verbera.
Exclusit illam non semel tectis quoque,
Rimam sed astu repperibat callido,
Qua se inferebat: alius nec deerat cibus,
Arcere posset quo famem, sed pabula
Quaesita furto plus palato arriserant.
Cum factum amico rettulisset improbum,
Hoc ille sapiens porro consilium dedit:
Servare posthac si cupis furfur tibi,
Frangas oportet aut molam, aut perimas Canem.
Quicumque prava peccat assuetudine,
Nullo valebit corrigi piaculo.