XXII.

Illyr. Svaka rusa ima draccju.

Omnis rosa habet adjunctam spinam.

Rosa spinis septa.

Cum pulcra Tyrio murice arderet Rosa,
Aurasque suavi recrearet halitu,
Sibi ipsi nimio plus placebat, propriis
Sic ausa stulte gloriari dotibus.
Venustula quidem lilia, et facile nivem
Candore praeeunt; acer his odor tamen.
Hyacinthe, vultus forma bellula est tui;
Luteus at ille te color vilem facit.
Amoena multum viola, et insigniter olens;
Solo sed humilis serpit: hi contendere
Mecum potuerant; longe at inferior mihi
Est turba florum caetera. Hanc Rex aetheris
Sibi tantum ut audit arrogare, horrentibus
Spinarum texit circumquaque aculeis.
Nimirum ab illo tempore has habent rosae,
Nilque est beatum parte ab omni cernere.
Tibi ille felix ne sit, insanum putat
Quem vulgus: animum cura et regalem premit.