XXXII.

Illyr. Ghdje velle nauchjera, baerſose brod raſbje.

Ubi multi naucleri, cito frangitur navigium.

Naves duae.

Pinus recisae Juliis in Alpibus,
Quas in Gravosii (*) parte declivi sinus
In geminas doctus verterat rates faber,
Compactae eodem forma, onustae mercibus
Iisdem aquoso pariter in Thetidis sinu
Secunda ventis explicabant carbasa.
Cum subito eois intonata fluctibus
Saevit procella, parque monti verberat
Unda utriusque latera: jam nautae gemunt
Pavore mortis occupante pectora.
Harum una ventis, fluctibusque strenue
Victis adivit tuta portus ostia.
Excussa cursu dum vagatur altera
Ventorum arbitrio, nec tumentes sustinet
Undas profundo mergitur ratis salo.
Quaeris, carinis unde dispar exitus?
Uni illa, multis haec magistris paruit.
(*) Portus, vulgo dictus S. Crucis, mille passus Ragusio distans, ubi naves construuntur.