XXXVII.

Illyr. Hochjese, dati posteglja dobro rodj.

Oportet bonum tibi ut fructum thalamus afferat.

Vota exaudita.

Cuncti optant prolem conjuges, pauci bonae
Sibi ut contingat indolis poscunt Deos,
Pravaeque vitia negligunt eradere.
Uxore ducta duo petebant ab Jove
Quod voto avebant obtinere dispare.
Hic, ut quotannis redderet agellus bene,
Ut procreandis posset inde liberis
Sufficere victum liberalem, et splendidas
Pro dignitate vestes; ille, ut redderet
Sibi bene thalamus nuptialis, praedii
Foecunditatem curae permittens Dei.
Rata utriusque vota fecit Jupiter.
Ille ex agelli fructibus, quos uberes
Continuo in annos colligebat singulos,
Prolem in deliciis nutriebat, anxius
Parum, quibus animum expoliret moribus.
Hic cum praeclarae suscepisset indolis
Pueros, ab annis erudire primulis
Coepit, et honestis institutis cereas
Formare mentes, exemploque accendere:
Segesque quamquam sterilis haud illum semel
Elusit, illa filiis in commodum
Tamen et calamitas versa, parsimonia
Hoc edocente rem tueri patriam.
Ast alii in epulis, inque cultu corporis
Qui vitam ab annis mollibus traduxerant,
Brevi dilapidant pingue patrimonium.