Croatiae auctores Latini: inventa |
domum | qui sumus | textus | auxilia | tolle, lege! | |
Ferić Gvozdenica, Đuro (1739–1820) [1794], Fabulae, versio electronica (), 2266 versus, verborum 52873, Ed. Sanja Perić Gavrančić [genre: poesis - fabula] [word count] [fericdfab].
XL.
Haud temere benefacias, ne tibi malum arcessas. Pauper ingratus. Narratione fabulosa ne elevem Hoc dictum, Amicus suasit, et mox incipit Narrare. In Urbe, quam non longe ab ostio Proles Philippi condidit Canopico, De faece quemdam novi plebis infimae, Stipem erogare quotidie cui Gallicus Negotiator in duobus nummulis Solebat; idque continenter pluribus Annis, neque semel praetermittens, egerat. Demum hinc profectus patrium repetiit solum Beneficus ille, plurimum faciens morae: At causa eodem cum redisset mercium, Agnovit hominem pauper, et facessere Huic certus aliquod tristius negotium Incoepit illud serio contendere, Sibi tantum ut aeris solveret, quantum, ab loco Nisi abfuisset, erogasset in stipem. Negotiator hominis impudentiam Miratus illud exigentis, quod suo Dare arbitratu, vel negare jus fuit, Petitionem ridens parvipendere. At lite pauper intentata ad judicem Loci accersivit. Pro se uterque ut dixerant, Praetor primum hominis odio, cui dispar suae Religio fuerat; mox ut ipsi extorqueat Inopi pecuniam, illi causam adjudicat; Absentiaeque supputato tempore Certa damnatur alter in pecunia. Cui feceris bene, sedulo considera, Tuo ne abutens improbus beneficio, Te luere poenas cogat imprudentiae.
Ferić Gvozdenica, Đuro (1739–1820) [1794], Fabulae, versio electronica (), 2266 versus, verborum 52873, Ed. Sanja Perić Gavrančić [genre: poesis - fabula] [word count] [fericdfab]. |
Zbirka Croatiae auctores Latini, rezultat Znanstvenog projekta "Digitalizacija hrvatskih latinista", dostupna je pod licencom Creative Commons Imenovanje-Nekomercijalno-Dijeli pod istim uvjetima 3.0 Hrvatska.
Podatke o projektu vidi na www.ffzg.hr.
Za uporabe koje prelaze okvire ove licence obratite se na http://www.ffzg.unizg.hr/klafil/dokuwiki/doku.php/z:digitalizacija-hrvatskih-latinista.