20. De Sanctissimo Eucharistiae Sacramento
Huc ades, o quicumque pius, tibi namque paratur
Dives coelesti mensa beata dape.
Exigit haec animo curas durumque laborem,
Et male pressa gravi pondere corda levat.
Haec totum complet mira dulcedine pectus,
Et bona fert verae gaudia laetitiae.
Hinc vigor est menti, mores hinc coelite digni,
Vitaque, divinum quae decet, illa, genus.
Quidvis opta; aberit rerum pars nulla bonarum,
Nacto fontem, ipsum profluet unde bonum.