350. Monet Lydam, quid sit factu, si quid triste acciderit.
Triste ubi quid metuis, vel fers, Lyda optima, coelum
Suspice, et, heu, tacita paucula mente refer:
"Cuncta potes, scis cuncta, Deus; meme ipsa regendam,
Atque meos nutu do, Pater, usque tuo.
Nil possum, contra nil pugno: quae facis, aequo
Cuncta fero, laeto pectore cuncta probo."
Haec semel, haec iterum dic tecum, Lyda: reperta
Omnis jam fuerit certa medela mali.