Škrlec Lomnički, Nikola (1729-1799) [1798], Ad Maximilianum Verhovacz epistola 16. Octobris 1798, versio electronica (, Jakovlje), Verborum 1108, Ed. Neven Jovanović Josip Kolanović [genre: prosa oratio - epistula] [word count] [skerlenepistverh17981016].
Hi sunt quinque cardines circa quos publica comitatus administratio potissimum versatur.
Ostendant mihi inimici quod in hos propter meam surditiem aliqui defectus arrepserint et ego
victas dabo manus. Cum hoc non possint, illi alios vagos defectus mihi volunt imputare. Dicunt
quod propter meam nimiam indulgentiam magistratuales, ac praesertim vicecomes et notarius, pro
arbitrio agant. Hic enimvero ad propriam tuam notitiam tuto possum provocare. Recordaberis enim
quod hactenus id potius mihi obiectum fuerit quod nimis despotice agam. Ita cum alii me
despotismi, alii e converso remissionis arguant, evidens est quod in utroque medium teneam, id
est quod magistratuales quidem placide, sed in re officii severe tractem. Dicunt quod aliquae
comitatus repraesentationes asperiori calamo appositae sint. Si aut ego ipse diutius in
dicasteriis non servivissem, aut omnes momentosiores repraesentationes ipse non reviderem,
posset me dubium subire an non id re ipsa quandoque evenerit. Nunc, si quae mihi repraesentatio
in specifico obiciatur, paratus sum de singula eius expressione rationem reddere.
Škrlec Lomnički, Nikola (1729-1799) [1798], Ad Maximilianum Verhovacz epistola 16. Octobris 1798, versio electronica (, Jakovlje), Verborum 1108, Ed. Neven Jovanović Josip Kolanović [genre: prosa oratio - epistula] [word count] [skerlenepistverh17981016].
|