Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
Iosephi huius cęterorumque conuersionem minus mirabitur, qui animum
attenderit, quod Ioannes Damascenus, Mesuę Iudei filius, Iudeorum omnium -- 1-425 -- doctissimus, Hebreis Gręcisque litteris ęque eruditus, nemine
cogente, contulerit sese ad Christianitatem. Nunquid nesciuit Legem?
Ignorauit prophetas? Non intellexit Psalmos? Immo, quia ista omnia
percalluit, ideo credidit in eum, quem in iis scriptum reperit, ipso
dicente: Scrutamini Scripturas! Illę sunt, quę testimonium perhibent de
me. Et iterum: Si crederetis Moysi, crederetis forsitan et mihi.
De me enim ille scripsit. Signanter, ut mihi uidetur, dixit
forsitan. Sciebat enim quosdam ex illis futuros, qui etiam Moysi credentes
magis eligerent obstinatione sua perire quam Christum a Moyse et prophetis
pręmonstratum confitendo suscipere et per eum saluari. Neque enim est
aliud nomen sub cęlo datum hominibus (ut Petrus apostolus ait) in
quo oporteat nos saluos fieri.
Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
|