Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
Iuuenalis, natione Apher, arte medicus, ordine presbyter, cum a pontifice
Romano, ut Narniensi infideli populo Christum euangelizaret, ius
potestatemque sibi concedi petisset, episcopus eorum constitutus illo se
contulit. Multisque ibi catholica credulitate prędicando confirmatis quendam
de obstinatorum numero, cui pręter cęteros error ueritate charior erat, sibi
infensissimum habuit. Qui comprehensum, postquam, ut carnem idolo immolatam
gustaret, cogere uerbis non potuisset, uiribus aggreditur. Cultellum ori
admouet, strictosque dentium dirimere ordines molitur, uiam facturus cibo
intra fauces respuentis indendo. At multo secus quam cogitarat euenit.
Repente enim quadam lymphatę mentis insania correptus, cuspide in se uersa,
ipse sibi iugulum ferit et ad pedes eius, quem inuaserat, exanimis corruit.
-- 2-419 -- Sic tutatus est Dominus pii doctoris disertum guttur, ut
hic, qui illud per uim polluere attentauerat, suum confoderet et sua sibimet
manu mortem conscisceret. Eo cadente reliqui omnes, qui in pari infidelitate
diu iacuerant, per fidem sese errexere Christi, et unius increduli poena
multis credendi causam prębuit.
Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
|