Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
Huius cruciatus grauitatem non mediocrem, sed prope maximam esse etiam
ratione argumentisque probari posse uidetur. Quippe exuto corpore, quod
aggrauat, purior fit in anima intellectus. Vnde in Psalmo dicitur: Anima
mea cognoscet nimis. Quanto autem quis Deum magis intelligit, tanto
magis appetit. Hic uero appetitus ex certitudine quoque spei capit passionis
incrementum. Auidius enim bonum illud quisque appetere solet, quod se minus
dubitat assecuturum. Ideoque ex dilatione rei magis appetitę magis animo
torquetur. Hinc est illud Prophetę: Concupiscit et deficit anima mea in
atria Domini.
Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
|