Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
Iob ipse non tantum pedibus aut manibus aut aliquo membrorum ęger erat, sed
toto prorsus corpore tabidus atque putridus et a planta pedis usque ad
uerticem foedissimis hulceribus confectus. Testa saniem radebat iacebatque
in sterquilinio, magis etiam dolendi causas habens, quod paulo ante omnem
substantiam (cum opulentissimus esset) una cum liberis amiserat. Nec tamen
cogi unquam potuit, ut saltem labiis peccaret. Vxor iacenti assidebat, non
quę consolaretur afflictum, sed petulantia sua grauius exasperaret. Nanque
tantarum impatiens erumnarum iubebat, ut iam in suam ille necem maledictis
Deum prouocaret. At uero Iob non ignarus longe maiorem esse miseriam Deo
peccare quam ista pati, in ipsam indignatus: Quasi - inquit - una
de stultis mulieribus locuta es. Si bona sus cepimus de manu Domini,
mala quare non sustineamus? Affligens me dolore non parcat, nec
contradicam sermoni bus Sancti. Merito igitur post tot aduersa
talemque patientiam duplicia dicitur recepisse, cęteris felicior futurus,
qui, dum uiueret, miserior existimabatur.
Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
|