Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
Et hoc quoque relatu dignum de illo ferunt: dum uerbera terroresque
perferret, lucem diuinitus apparuisse, qua expauefacti demones diffugere,
Antonium uero eo splendore recreatum errexisse se et, quasi pręsentem
Dominum aspiceret, dixisse: Vbi eras, bone Iesu, ubi eras? Responsumque
accepisse: Aderam, Antoni, sed euentum pugnę tuę pręstolabar. Quam quoniam
imperterritus immotusque uiriliter sustinuisti, manet te uictorię tuę
indeficiens in cęlo triumphus immarcessibilisque corona pręmiumque
sempiternum. Igitur omnis diaboli uis atque decertatio sola pii propositi
continuatione destruitur atque dissipatur. Perseuerauit nempe Antonius et
mala, quę perpessus est, ad glorię illi cessere incrementum.
Marulić, Marko (1450-1524) [1496], De institutione bene vivendi per exempla sanctorum, versio electronica (, Split), Verborum 186963, Ed. Branimir Glavičić [genre: prosa oratio - tractatus] [word count] [marulmarinst].
|