Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
-- 545 -- Abacuch propheta pręuidit, cum ad Deum uerba conuertens diceret: In luce
iacula tua ibunt, in splendore coruscationis* armorum tuorum. Et sanctus psalmista
Dauid: Sagittę tuę acutę — inquit — populi sub te cadent. Hi fuerunt
fontes et torrentes et flumina iuxta illud: Tu dirupisti fontes et torrentes. Et
illud: Flumina plaudent manu, simul montes exultabunt. Hi fuerunt pastores illi,
de quibus in Hieremia locutus est Dominus: Dabo uobis pastores iuxta cor meum, et
pascent uos scientia et doctrina. Hi fuerunt custodes illi et speculatores, quos
Ecclesię suę apposuit Dominus ad eam in Esaia dicens: Super muros tuos constitui
custodes. Et per eundem prophetam: Regnabit — inquit — Deus tuus,
vox speculatorum tuorum. Ad quos in Euangelio Saluator ait: Non uos estis, qui
loquimini, sed Spiritus Patris uestri, qui loquitur in uobis. Hi fuerunt sacerdotes
illi, de quibus in psalmis dixerat Deus: Sacerdotes eius induam salutari. Hi
fuerunt petrę, lapides et montes, de quibus Amos propheta: Nunquid currere possunt in
petris equi?** Hoc est, equi pharaonis, demonia mala, pręualere discipulis Christi. De
lapidibus autem impolitis, quos ferrum non attigit, altare Domino ędificatum in libro Iesu
Naue legimus. Lapidum istorum impolities apostolorum integritas est, quam nulla malarum
cupidinum uis corrupit. Tales erant illi, quibus Petrus apostolus scribens ait: Et ipsi,
lapides uiui, superędificamini domos spiritales in sacerdotium sanctum. Montes autem
psalmista nominat: Montes exultabunt in conspectu Domini. Et iterum: Montes
in circuitu eius, et Dominus in circuitu populi sui. Et rursum: Fundamenta eius
in montibus sanctis. Apostoli quippe fundamenta Ecclesię sunt, apostolorum autem
fundamentum Christus est.
Hi fuerunt principes illi, quos pręuidens Dauid dixit: Principes Iuda, duces eorum,
principes Zabulon et principes Neptalim. Ab istis enim tribubus orituri erant
principes isti Ecclesię, apostoli Christi. De quibus in alio psalmo *corr. ex.
corruscationis
**corr. ex. ęqui
Marulić, Marko (1450-1524) [1519], De humilitate, versio electronica (), Verborum 81625, Ed. Branimir Glavičić [genre: prosa oratio - tractatus] [word count] [marulmarhumil].
|