Tolluntur coelo atque humili a Tellure recedunt.
Quae[ERROR: no link :]6 saliunt semper tremulaque in luce coruscant
Tenvibus et radiis ut acutae cuspidis ictu
Percellunt oculos rutilantia, semper eosdem
Inter se positus atque intervalla tuenti
Objiciunt certa et nullum mutata per aevum.
Hinc ea fixa vocant. Summi ad confinia mundi
Illa quidem spatiis elata immanibus omnes
Mensorum eludunt curas et se ardua condunt.
Nec tenues mittunt radios: fors igne nitentem
Aut aequant Phoebum aut etiam nitidissima vincunt.
At circum immensas late distracta per auras
Lumina dispereunt longoque labore viarum
Nocturnas aegre vincunt jam fessa tenebras.
Si liceat spatium superare immane volatu
Daedaleo coelique altos conscendere fines,
Ipsum etiam videas pariter decrescere Phoebum
Paulatim et caeca demum se condere nocte.
Quis tamen et formas omnes et nomina pandat
Singula connumerans certasque ex ordine sedes?
In medio stellis ardet fulgentibus ingens
Fascia[ERROR: no link :]7 et immenso coelum complectitur orbe
Excurrens longe, qualis quae regia frontem
Praecingit vitta et comptos de more capillos
Comprimit adstringens, vel qui demittitur alte
Ex humeris laterique affixum sustinet ensem
Balteus, Eoo advectis e littore gemmis
Concharumque nitet spoliis auroque refulget.
Bissenis illam signis fulgentibus unam
Concessisse deos dicunt. Stant ordine longo
Disposita in gyrum et spatiis aequalibus ardent.
Prima tenet rutilisque Aries se cornibus alte
Erigit et puri tenues petit aetheris auras
Ostentatque nitens aurato vellere dorsum.
Ille olim aequoreas genitos Athamante per undas
Phryxum atque exceptam fatis obstantibus Hellen
Extulit. Hirsuto frater sedet altus in auro
Et ventos, tumidi despectat et aequoris iram,

Previous page

Next page